خانه / سیاسی / نۆرۆز ژە هۆرامانەنە؛ نمادو ئەوەژیوای، ئاشتی، ئومید، و پامدرای

نۆرۆز ژە هۆرامانەنە؛ نمادو ئەوەژیوای، ئاشتی، ئومید، و پامدرای

 

ژیار سڵامەتیان

 

نۆرۆز، پێسەو جەژنێوە فەرهەنگیێ و کۆمەڵایەتیێ سەرچەمەو پێوەرە ژیواو گردینو ئینسانەکاو جەهانین، چە ئا خەڵکانە کە داعیەشان هەن کە نۆرۆز پێسەو جەژنێوە موقەدەسێ جامعەو ئادیشانە چەکەرەش بینان و سەرش هۆردان، و چە ئا ملەتانە کە نۆرۆزشان پێسەو بەشێو ئەو فەرهەنگو جامعەو وێشان پەسەنشا کەردەن و دڵوەشێنێ پەنەش. گردینو جامعەو ئینسانەکان متاوا نۆرۆزی بە بەشێو ئەو فەرهەنگو وێشان بزانان و بە بەشێو ئەو فەرهەنگو وێشان لەیکش بدانەوە و چەنەش پەی یاوای بە وەشبەختی و نیازە مەعنەوی و مادیەکاشا بەهرەش چەنە بەرا. فەلسەفەو نۆرۆزی، جیا جە ئەواجەرۆیێوە ڕۆحی و مەعنەوی، هێقم کەردەو ژیوای جەمعین، ئاشتی واسەین. ئامایوەو سەرو خەتەو ڕاسی و حەقێقەتین، هایاوەکەردەو ئینسانین پەی وەشتەر ژیوای، زاڵ بیەو ڕۆشنایی ملوو لێڵی و تاریکیرەن، نۆرۆز بە مەعناو ئەوەژیواو زەمینین، بە زینە بیەیوەو تازەو زەمینی، درەختەکا، گیواوەکا، و ئەنواعو گیاندارەکا جە حەیوانی گێرە تا ئینسانەکا، وێشان ئامادەو ژیوایێوە تازەی مەکەرانە، و ڕووبە کامڵ کەردەو تەکاموڵیشا هەنگامە هۆرمنیا. بە زینە بیەو زەمین جە وەرزەو نۆرۆزینە ئینسانەکا پامدرایشان پەی وەشتەر ژیوای مەوزانە کار و زاڵێ مەبانە ملوو تەنگو چەڵەمەکانو ژیوایەرە، و ڕاو هەقێقەت و وەشبەختی مەیۆزانەوە. نۆرۆز، مەعنابەخشەن پەی ژیواو ئینسانەکا، ئینسانەکان متاوانە بە پابەنی بە ئائینو نۆرۆزی، مەعنایێوە تازێ بەخشا بە ژیوایشان. مەعنایێوە پەڕ ژە هەست و سوزی مەعنوی و ئینسانی کە بتاوی پا مەعنایە، سەرچەمە و مەبنایێوە پەی دەلیلو ژیواو ئینسانی یۆزیوە. پەی ئێمەی هۆرامی زوانی، و جامعەو هۆرامانی، بنەڕاو تاریخیوە هەتارە ئارۆ، نۆرۆز سەرچەمەی عیرفانی، ئومیدبەخش، شادی بەخش و مەشێوە تازە بیەن پەیما. پەوچی لاو ئێمەی هۆرامی و دلێو فەرهەنگو هۆرامانینە، نۆرۆز تایبەتیمەندیی و ئێژانە و کێشانەیێوە تایبەتش بیەن و هەنش. ئیساسەن، نۆرۆز دلێو فەرهەنگو هۆرامانینە، جوابێوە بیەن پەی نیازەکاو ئینسانی و پەوچی فرەو وەختا چەپوانەو ملەت و قۆمەکاتەری کە نۆرۆزی بە جەژنێوە زودگوزەرە مەوینان، دلێو فەرهەنگو هۆرامانینە نۆرزەن کە مەبۆنە بە ئیساسو ئەوتەر وەرزەکانو ساڵێ، و پەوچی نۆرۆز جە هۆرامانەن موقەدەسەن و لاو هۆرامیەکانوە، نمادو ئاشتی، شادی، یاردیدای بە هەژارەکا، و نمادو پامدراین وەرانوەرو زاڵمەکانوە.
ئومیدوارێنمێ گردینو خەلکو جەهانی، جەژنەو نۆرۆزی بکەران بە سەمبۆل و خاڵێوە هامبەشەی فەرهەنگیە، تا چا ویەرەوە ڕاگاو ئاشتی و بەرابەری و ئێحترام بە کەرامەتو ئینسانەکان جاگیر و گردگیر بۆنە، تا ئینسانەکا زاڵێ بانێ بە بەدبەختی و نەدامەتیەکانشارە.

Image 2

درباره ی mariwankhabar

همچنین ببینید

از سال 87 تاکنون 186 تانکر حامل سوخت در محورهای مواصلاتی کردستان واژگون شده است/جاده‌های کردستان؛ به زیبایی بهشت به ترسناکی جهنم

از سال 87 تاکنون 186 تانکر حامل سوخت در محورهای مواصلاتی کردستان واژگون شده است …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *