خانه / اجتماعی / نەورۆز و نەورۆزانە

نەورۆز و نەورۆزانە

 

حۆسەین وەفایی

شاعێر و نویسەر

ئی دنیای پەی جوانی و جوانخاسی بنەڕەت نریاینە،شادیانە تاموو ئی چاشتەگرینیە بیەن و تاڵیش تەفروتوونا کەردەن دلێ خوانەو دەورانەکانە، تا زەماونەو گیان و لاشەی وەشتامە بۆ و بنیشا سەروو سفرەو ئاواتەکا. ئاوی و هەوا و خاک، فرە ئاڵۆزێ وێ ڕازناینێ و پیقەو نەچیروو خیاڵەکا مەی سەرکڵاوێ وەرزەکانە، ئەجۆ قاقمەو ژەرەژەو دڵی مشۆ حەتمەن دلێ بەننەنوو چەماو لەیلێنە سۆڕیۆ تا عەشق ئەهوەن بۆوە دلێ سینەکانە، جاران هەنگە زەردە تۆشەبەرە بینۆ کۆڵێشەرە و بۆ مەجنوونوو دەربەنەکا و تۆریۆ ئەو تەمەدونی بێ گۆڵی، جا زەمانە مەرگش پەی کەی بۆ؟ خۆ ئەنا بڵبڵیچ باروو سەفەریش بینان، هاوارش هۆرزۆ دەی‌ها زەمین چۆڵەن هەواروو جوانی، دەی سازنە بەزم و نەزم، ڕازنە دنیای با یارێ نەتۆریا، وەیوە ڕازنەوە خاڵ و مێڵش بڕەژە با گەرمش کەرمێ جە خەمزە و نازی، وەیوە بارە زەماونگا واچەش نەورۆز.
نەورۆز و نەورۆزانە جۆراوجۆری و دەوری تازە وەزنۆنە دلینەو ژیوای، ئاوەختە سیمای تازە منیشۆ ڕوانبەروو هەستی، گوایا سرۆشت ئی ڕەوتشە فرە ژیرانە فامان و نمازۆ دڵەکێ وێدەق مدرا، گرساڵیە وێ وزۆ پەو باوەرە و ژیوایە تازە بە تارمەی تازەتەر گەشە مدۆ بە ڕۆحی و شەوق گێرۆ سەما تا جوانی فڕیۆ ئاسمانەنە.
شەتاوێ مارا مەی جە سەرچەمەو پاکی و پیاڵەو چەما گۆزا جە زەریفی، ئیسە وەختوو گۆستەو کونەو ئارەزوەکان، تا یاوای هەواروو ئەهوەنی ئاننە ڕا نەمەنێنە دەی هاها.
ئەنا ئامێوە ئاشقە ناسک دڵەکێ، دیسان بڵبڵ خەریکەن لای لای ماچۆ گۆشی نازارارە و هەنگێ دەمدەمانی کەرا چەنی گۆراڵا.
بەدگۆ وەختوو کۆچوو تۆن، ئینە وەڵاتوو وەهم و قینێ نیەن، ئیگە جێژوانوو دڵەکان، ڕاسین و پاکی، تەقەو ماچا و هەقەکا سەروو لچاو مافەکان. ئیسە وەختوو سەفەری ئەوەناماو سیاوین، سمێڵێ چیگە پیقەشا مەی و زڵفێ پەخشانێ شەماڵینێ، سرۆشت چەمێ لاونۆ و چەمێ ناز کەرا پەی وینای. ئارۆ و ئیگە و ئیسە گردێ وەششا گنۆ باڵا برمانا.

Image 2

درباره ی mariwankhabar

همچنین ببینید

اطلاعیه برگزاری مراسم مردمی کومسای هورامان تخت 

اطلاعیه برگزاری مراسم مردمی کومسای هورامان تخت صباح محمدی،بخشدار هورامان به مریوان خبر: با استعانت …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *